«Атлетико» ва Колумбия терма жамоасининг собиқ ҳужумчиси Радамель Фалькао «Олтин тўп»ни қўлга киритишни орзу қилгани ҳақида гапириб берди.

Фалькао 2012 йилги сўровнома натижаларига кўра, Лионель Месси, Криштиану Роналду, Андрес Иньеста ва Хавидан кейин 5-ўринни эгаллаган эди.

«Бундай футболчилардан кейинги ўринда бўлиш катта маънога эга. Айниқса, Агуэро ва Форлан кетганидан сўнг жамоани қайта қураётган «Атлетико»да ўйнаганимни ҳисобга олсак. Диего Симеоне Грегорио Мансанонинг ўрнини эгаллагунча мавсум қийин кечган эди.

Ҳар бир футболчи ҳам набираларига бундай гапларни айтиб бера олмайди (кулади). Мен, албатта, «Олтин тўп»ни ютишни орзу қилганман, лекин мен Криштиану ва Месси авлодиданман. Испанияда ўтказган икки йилим давомида Ла Лигада 24 та ва 28 та гол урдим. Улар бўлмаганида, мен энг яхши тўпурар бўлардим (жилмаяди). Ўйлашимча, «Атлетико»даги иккинчи мавсумимдагидек ҳеч қачон кучли бўлмаганман», — деди Фалькао.