«Тоттенхэм» жамоа бош мураббийи Томас Франкни истеъфога чиқарди. Бу қарор Лондон клуби ўз майдонида «Ньюкасл»га 1:2 ҳисобида имкониятни бой берганининг эртасигаёқ қабул қилинди. «Шпорлар» Премьер-лига турнир жадвалида 16-ўринга тушиб кетишди, бу эса, юмшоқ қилиб айтганда, жамоа учун жуда ёмон кўрсаткичдир.
Журналист Бен Жейкобснинг хабар беришича, «Тоттенхэм» мураббийлик постига номзод сифатида Маурисио Почеттинони кўриб чиқмоқда. Бироқ аргентиналик мутахассис фақат ёзда, Жаҳон чемпионатидан кейингина жамоага кела олиши мумкин. Ҳозирда Почеттино АҚШ терма жамоасини ўз уйларида ўтадиган мундиалга тайёрламоқда.
Қайд этилишича, Почеттинонинг ўзи ҳам «Тоттенхэм»га қайтишга тайёр. У 2014 йилдан 2019 йилгача жамоада ишлаган ва «шпорлар»ни ҳатто Чемпионлар лигаси финалигача олиб чиққан эди.
