«Тоттенхэм» клуби чоршанба куни истеъфога чиқарилган Томас Франк ўрнига янги номзод изламоқда. Даниялик мутахассиснинг кетиши расман эълон қилинганидан кўп ўтмай, Роберто Де Дзербининг ҳам «Марсель»ни тарк этгани маълум бўлди — айнан италиялик мутахассис «шпорлар»нинг янги бошқарувчисига айланиши мумкин.
Журналист Николо Скиранинг хабарига кўра, Лондон клуби «Брайтон»нинг собиқ устози номзодига жиддий қизиқиш билдирмоқда ва аллақачон эҳтимолий ҳамкорлик шартлари бўйича маълумот сўраган.
Роберто Де Дзерби 2024 йилнинг ёзидан буён «Марсель»да ишлаб келаётган эди, унгача эса икки йил давомида «Брайтон» бошқарувида муваффақиятли фаолият юритган. Миш-мишларга кўра, 46 ёшли мутахассис Англия Премьер-лигасига қайтишни истамоқда.
