«Бавария» ярим ҳимоячиси Александр Павлович «РБ Лейпциг»га қарши бўлиб ўтган баҳсдаги футболчилар ўртасидаги тўқнашув ҳақида тўхталиб ўтди.

Германия Кубоги чорак финали доирасидаги учрашув мюнхенликларнинг 2:0 ҳисобидаги ғалабаси билан якунланди. Ўйиннинг иккинчи бўлимида майдонда кичик низо келиб чиқди ва унинг натижасида Павлович сариқ карточка билан жазоланди.

«Мен ҳаддан ташқари тажовузкорлик кўрсатдим, бундай бўлиши керак эмас эди. Аммо ҳиссиётлар — футболнинг бир қисми. Жамалга (Мусиала) нисбатан зарурат бўлмаган ҳолатда қўполлик ишлатишди, шу сабабли жаҳлим чиқди. Аслида мен босиқ бўлишим керак эди, лекин ўша вазиятда бу Жамални ҳимоя қилиш учун эди», — дея Павловичнинг сўзларини келтирмоқда «Bayern & Germany».

«Бавария» навбатдаги ўйинини 14 февраль куни «Вердер»га қарши ўтказади. Бундеслиганинг 22-туридан ўрин олган ушбу баҳс Тошкент вақти билан 19:30 да бошланиши режалаштирилган.