«Bavariya» yarim himoyachisi Aleksandr Pavlovich «RB Leypsig»ga qarshi bo‘lib o‘tgan bahsdagi futbolchilar o‘rtasidagi to‘qnashuv haqida to‘xtalib o‘tdi.

Germaniya Kubogi chorak finali doirasidagi uchrashuv myunxenliklarning 2:0 hisobidagi g‘alabasi bilan yakunlandi. O‘yinning ikkinchi bo‘limida maydonda kichik nizo kelib chiqdi va uning natijasida Pavlovich sariq kartochka bilan jazolandi.

«Men haddan tashqari tajovuzkorlik ko‘rsatdim, bunday bo‘lishi kerak emas edi. Ammo hissiyotlar — futbolning bir qismi. Jamalga (Musiala) nisbatan zarurat bo‘lmagan holatda qo‘pollik ishlatishdi, shu sababli jahlim chiqdi. Aslida men bosiq bo‘lishim kerak edi, lekin o‘sha vaziyatda bu Jamalni himoya qilish uchun edi», — deya Pavlovichning so‘zlarini keltirmoqda «Bayern & Germany».

«Bavariya» navbatdagi o‘yinini 14 fevral kuni «Verder»ga qarshi o‘tkazadi. Bundesliganing 22-turidan o‘rin olgan ushbu bahs Toshkent vaqti bilan 19:30 da boshlanishi rejalashtirilgan.