"Ливерпуль" бош мураббийи Арне Слот ўз жамоасининг икки марказий ҳимоячиси — Ибраима Конате ва Виржил ван Дейкни ўзаро таққослади.
Жорий мавсумда француз футболчиси хатолари туфайли тез-тез танқидлар нишонига айланмоқда. "Қизиллар" устози 26 ёшли ўйинчининг хизматларини паст баҳоламасликка чақирди.
"Ибраима Виржил каби яхши ўйинчи. Ишончим комил, ёшдаги фарқ ҳам ўз ролини ўйнайди. Ибу охирги пайтларда ажойиб ўйин кўрсатмоқда. У мавсум бошида ҳам яхши ҳаракат қилганди, аммо биргина голга олиб келган хато одамларнинг унга бўлган муносабатини дарров ўзгартириб юборди.
Мен "Ливерпуль"га келган вақтимдан бери Конате ва ван Дейк майдонда доимо ажойиб тарзда ҳамкорлик қилиб келишмоқда. Иккаласи ҳам доимий равишда яхши спорт формасида ва биз учун муҳим аҳамиятга эга — бу нафақат уларнинг маҳорати, балки ҳимоядаги вариантларимиз камлиги билан ҳам боғлиқ", — дея Слотнинг сўзларини келтиради "Anfield Sector".
Бугун Тошкент вақти билан соат 01:00 да (якшанбага ўтар кечаси) Англия Кубоги доирасидаги "Ливерпуль" ва "Брайтон" ўртасидаги баҳс бошланади.
