Каталониянинг "Барселона" клуби ҳимоячи Алехандро Бальдени чап қанот ҳимоясидаги узоқ муддатли лойиҳа сифатида кўрмоқда. Бу ҳақда "Diario SPORT" нашри хабар бермоқда.
Манба берган маълумотларга кўра, "кўк-анорранглилар" 22 ёшли испаниялик футболчини узоқ йиллар давомида таркибда сақлаб қолмоқчи, бироқ ҳозирги вақтда клуб унинг ўйинидан унчалик мамнун эмас. "Барселона" Бальдедан кўпроғини кутмоқда.
Бальде — клуб тарбияланувчиси ҳисобланади. Жорий мавсумда у барча мусобақаларни инобатга олганда 31 та ўйин ўтказиб, учта голли узатмани амалга оширди.
Ҳимоячининг каталонияликлар билан амалдаги меҳнат шартномаси 2028 йилгача мўлжалланган. "Transfermarkt" мутахассислари футболчининг қийматини 60 миллион еврога баҳолашмоқда.
