"Бавария" вингери Майкл Олисе Германия чемпионатининг навбатдаги тури доирасидаги "Вердер"га қарши ўйинда иштирок эта олмайди.
Эслатиб ўтамиз, ўтган турда Олисе мавсумдаги бешинчи сариқ карточкасини олди, шу сабабли у бўлажак баҳсда ўз клубига ёрдам бера олмайди. Бу Олисе 2024 йилнинг ёзида "Кристал Пэлас"дан "Бавария"га ўтганидан бери Бундеслигада илк бор майдонга тушмайдиган ҳолатдир.
24 ёшли француз футболчиси бунгача бўлган барча 55 та учрашувда иштирок этиб, 22 та гол урди ва 36 та голли узатмани амалга оширди. "Бавария"нинг ҳозирги таркибидаги бирор ўйинчи бундай натижа билан мақтана олмайди.
Германия чемпионати 22-туридан ўрин олган "Вердер" ва "Бавария" ўртасидаги баҳс 14 февраль куни бўлиб ўтади. Учрашув Тошкент вақти билан соат 19:30 да бошланади.
