Лондоннинг "Тоттенхэм" клуби раҳбарияти Маурисио Почеттинони бош мураббий лавозимига қайтариш ғоясидан воз кечгани йўқ. Бу ҳақда "Telegraph" нашри хабар бермоқда.

Аввалроқ, Игор Тудор "шпорлар" билан жорий мавсум якунига қадар шартнома имзолагани ҳақида маълумотлар пайдо бўлган эди.

Манбанинг хабарига кўра, Тудорнинг тайинланганига қарамай, "Тоттенхэм" ёзда АҚШ терма жамоасининг амалдаги бош мураббийи Маурисио Почеттинонинг клубга қайтиш имкониятини очиқ қолдирган. Тудорнинг "Тоттенхэм" билан шартномаси 2026 йилнинг июнигача амал қилади, Почеттинонинг АҚШ терма жамоаси билан келишуви эса жаҳон чемпионатидан сўнг якунига этади.

Шуни таъкидлаш керакки, ҳозирча "Тоттенхэм" Тудорнинг тайинланганини расман эълон қилмади, бироқ пойтахт клуби аввалроқ қониқарсиз натижалар туфайли Томас Франк истеъфога чиқарилганини маълум қилган эди.

26 турдан сўнг "Тоттенхэм" 29 очко жамғарган ҳолда Премьер-лига турнир жадвалида 16-ўринни эгаллаб турибди.