Миланнинг "Интер" клуби бош мураббийи Кристиан Киву "Ювентус"га қарши ўйинда (3:2) симуляция ишлатганликда айбланган Алессандро Бастонини ҳимоя қилиб чиқди.
Меҳмонлар биринчи бўлим якунида бир киши кам бўлиб қолишди — Пьер Калюлю Бастонига ишлатган қўполлиги учун иккинчи сариқ карточкани олиб, майдондан четлатилди. "Нерадзуррилар" марказий ҳимоячисининг эҳтимолий симуляцияси ва рақибнинг қизил карточкасини намойишкорона нишонлагани ушбу эпизодни жанжалли тус олишига сабаб бўлди.
"Бастони симуляция қилмади. Контакт бор эди, Калюлю унинг қарши ҳужумга қочиб кетишига тўсқинлик қилди. Алессандро каби футболчининг симуляцияда айбланаётганидан афсусдаман", — дея журналист Николо Скира Кивунинг сўзларини келтирмоқда.
"Интер" бутун иккинчи бўлим давомида кўпчилик бўлиб ўйнади, бироқ ғалабани фақат ўйин сўнгида илиб кетди — 90-дақиқада Пётр Зелиньски учрашувдаги якуний ҳисобни ўрнатди.
