Миланнинг "Интер" клуби марказий ҳимоячиси Алессандро Бастони фаолиятини Англия Премьер-лигасида давом эттириши мумкин. Бу ҳақда журналист Экрем Конур хабар бермоқда.
Манбанинг маълумотларига кўра, Бастонининг хизматларига Лондоннинг "Арсенал" клуби қизиқиш билдирмоқда. Бироқ футболчини "Барселона", "Манчестер Юнайтед" ва Мадриднинг "Реал" клублари ҳам кузатиб бормоқда. Шу билан бирга, "Интер" ўз ҳимоячиси билан хайрлашишни истамаётгани таъкидланган, шу сабабли агар клублар италиялик футболчини қўлга киритмоқчи бўлсалар, жуда катта маблағ сарфлашларига тўғри келади.
Жорий мавсумда 26 ёшли Бастони барча мусобақаларни ҳисобга олган ҳолда 30 та ўйинда иштирок этди, битта гол урди ва ўз ҳисобига олтита голли узатмани ёздириб қўйди.
"Transfermarkt" портали маълумотларига кўра, футболчининг баҳоси 80 миллион еврони ташкил этади.
