«Барселона» бош мураббийи Ханс-Дитер Флик матбуот анжуманида иштирок этди. Табиийки, журналистлар яна «Атлетико»га қарши ўйин мавзусини кўтаришди. Каталонияликлар Испания Кубогида 0:4 ҳисобида мағлуб бўлишган эди.

— «Атлетико»га қарши ўйиндан қандай сабоқ чиқардингиз?

— «Атлетико» курашга, ҳақиқий жангга тайёр эди. Бу Чемпионлар лигаси даражасидаги ўйин бўлди, бизга эса дастлабки 45 дақиқада рақобатдош бўлиш учун иштиёқ етишмади. Улар яккакурашларда кучлироқ, ҳаракатларда эса динамикроқ эдилар. Бугунги машғулотда кўрганларим менга манзур бўлди. Энди буни ўйинга кўчириш керак. Мағлубиятлар бўлиб туради. Энг муҳими — унга қандай муносабат билдиришинг.

16 февраль куни «Барселона» сафарда «Жирона» меҳмони бўлади.