Машҳур собиқ футболчи Майкл Оуэн Лондоннинг «Арсенал» клуби ҳужумчиси Виктор Дьёкереш ҳақида ўз фикрларини билдирди.

Швециялик футболчи ўтган ёзда Лиссабоннинг «Спортинг» клубидан «канонирлар» сафига келиб қўшилган эди.

«Мен Дьёкерешдан ҳайратда эмасман. Агар у ҳар бир ўйинда майдонга тушса, албатта голлар уради. Лекин ҳозирги ҳолатимда ҳар ўйинда тушсам, ҳатто мен ҳам фойда келтиришим мумкин эди — чунки ҳозир бу жамоа жуда кучли ва кўплаб имкониятлар яратмоқда. Дьёкерешни муаммолар ечими деб аташ мумкинми? Ишончим комил эмас. 60 миллион фунт тўланган ҳужумчидан одам кўпроқ нарса кутади.

Агар эртага «Арсенал» Чемпионлар лигаси финалида ўйнаса, Артета Викторни асосий таркибга қўйган бўлармиди? Менимча, у Жезус ёки Хаверцни афзал кўрган бўларди. Бу эса кўп саволларга жавоб беради», — дея инглиз ОАВлари Оуэннинг сўзларидан иқтибос келтирмоқда.

Бугун Англия Кубоги доирасида «Арсенал» «Уиган»га қарши майдонга тушади.