16 февраль куни «Насаф» клуби ОФК Элит Чемпионлар Лигаси мусобақасининг 8-тури доирасида Бирлашган Араб Амирликларининг «Аш-Шаржа» жамоаси билан куч синашади. Келинг, ушбу жамоа ҳақида бироз тўхталамиз.

Тарих ва лақаб

«Аш-Шаржа» жамоаси 60 йиллик тарихга эга бўлиб, клуб 1966 йилда ташкил топган. Жамоага мухлислар томонидан «The King» («Қирол») ёки «Шаржа шаҳрининг қироллари» деган лақаб берилган.

Стадион

Клуб ўз уй учрашувларини Шаржа шаҳридаги «Sharjah Stadium»да ўтказади. Ушбу майдон ўз бағрига 12 мингдан зиёд мухлисни сиғдира олади.

Ютуқлар

Жамоа Бирлашган Араб Амирликлари чемпионатининг 6 карра ғолиби, 10 карра Президент кубоги соҳиби ва 4 карра мамлакат Суперкубоги ғолиби ҳисобланади. Шунингдек, жамоа ўтган мавсум «Осиё Чемпионлар Лигаси-2» мусобақасида ҳам зафар қучган.

Осиё майдонларидаги статистика

«Аш-Шаржа» шу вақтгача Осиё Футбол Конфедерацияси томонидан ўтказилган расмий мусобақаларда 62 та ўйин ўтказган. Улардан:

• 26 тасида ғалаба;

• 20 тасида мағлубият;

• 16 тасида дуранг қайд этилган.

Бош мураббий

Жамоани айни пайтда 61 ёшли анголалик мутахассис Хосе Мораис бошқармоқда. У ўз фаолияти давомида «Интер», «Реал Мадрид», «Челси» каби клубларда ишлаган. Мураббий «Чонбук Моторс» жамоаси билан 2 карра Жанубий Корея чемпионлигини, «Ал-Ҳилол» билан Саудия Арабистони Про лигаси ғолиблигини, шунингдек, 2023/24 йилги мавсумда «Сепаҳон» клуби билан Эрон Ҳазфи кубогини қўлга киритган.

Таркиб ва легионерлар

Жамоа таркибида айни пайтда Маро Катинич, Ю Мин Чо, Леандриньо, Владимир Прийович, Фета Фетаи, Фирас Бен Ларби, Игор Коронадо каби легионер футболчилар тўп сурмоқда.

Ушбу клуб Ўзбекистон миллий терма жамоаси футболчилари учун ҳам бегона эмас. Яқин йилларда «Аш-Шаржа» жамоаси сафида ҳамюртимиз Отабек Шукуров фаолият олиб борган.

Эслатиб ўтамиз, «Аш-Шаржа» — «Насаф» учрашуви бугун Тошкент вақти билан соат 21:00 да старт олади.