Англия Премьер-лигасида Рамазон ойи давомида тўп сурадиган мусулмон футболчилар учун махсус имконият яратиб берилади. Унга кўра, ифторлик вақти ўйин пайтига тўғри келиб қолса, футболчилар оғизларини очиб олишлари учун баҳс бир неча дақиқага тўхтатиб турилади.

Бу анъана сўнгги йилларда АПЛда мунтазам тус олган бўлиб, ҳакамларга қуёш ботган вақтда ўйинда қисқа танаффус эълон қилиш бўйича кўрсатмалар берилади. Бу вақт ичида футболчилар сув ёки енгил тамадди билан қувватларини тиклаб олишлари мумкин.

Бундай қарор лига раҳбарияти ва ҳакамлар корпорацияси (PGMOL) томонидан мусулмон футболчиларнинг эътиқодини ҳурмат қилиш ҳамда уларнинг соғлиғини ҳимоя қилиш мақсадида қабул қилинган.