Италия терма жамоаси собиқ футболчиси Роберто Баджо "Манчестер Сити" бош мураббийи Хосеп Гвардиола ҳақида юқори фикр билдирди. Аввалроқ улар "Брешия" сафида бирга тўп суришган.
"Мен Пеп Гвардиолани яхши кўраман! Унинг жамоалари доим яхши ўйнайди, у ўзи фаолият юритган ҳар бир мамлакатда ўзини кўрсата олди. Агар ҳозир футболчи бўлганимда, унинг қўл остида ўйнашни истаган бўлардим", — дея Баджонинг сўзларини келтиради журналист Николо Скира "X" ижтимоий тармоғида.
Футболчилик фаолияти давомида Роберто Баджо "Ювентус" ва "Милан" таркибида Италия чемпиони бўлган, туринликлар билан бирга мамлакат Кубоги ва УЕФА Кубогини ҳам қўлга киритган. "Болонья" билан эса Интертото Кубогида зафар қучган.
Хосеп Гвардиола ўзининг мураббийлик фаолияти давомида "Барселона" ва "Бавария" клубларида ҳам ишлаган. Мутахассис ушбу жамоаларнинг ҳар бирида кўплаб нуфузли совринларни қўлга киритган.
