"Галатасарой" бош мураббийи Окан Бурук Чемпионлар лигасининг "Ювентус"га қарши бўлиб ўтадиган дастлабки ўтиш ўйинидан олдин ўз кутишлари билан ўртоқлашди.
Унинг сўзларига кўра, Истанбул клуби аъло даражадаги ҳолатда, жароҳат олган футболчилар эса сафга қайтмоқда.
"Ҳозирда биз Европадаги иштирокимиз давомидаги энг яхши жисмоний ва руҳий ҳолатдамиз, таркибимиз эса оптимал кўринишга яқин", — дея мутахассиснинг сўзларини келтиради УЕФА матбуот хизмати.
Бурукнинг қўшимча қилишича, "Галатасарой" турнирнинг 1/8 финалига тўғридан-тўғри чиқишни мақсад қилган эди, бироқ "ўтиш ўйинлари"га йўлланма олишни ҳам ёмон натижа деб бўлмайди.
"Галатасарой" — "Ювентус" учрашуви 17 февраль куни Истанбулда бўлиб ўтади. Ўйин Тошкент вақти билан соат 22:45 да бошланади.
