«Барселона» ва Испания терма жамоаси ҳужумчиси Ламин Ямал Испания Ла Лигаси 2025/2026 йилги мавсуми 24-туридан ўрин олган «Жирона»га қарши баҳсда пенальтини голга айлантира олмади. Футболчи ўз фаолиятида илк бор ўйиннинг асосий вақтида «нуқта»дан берилган зарбада хатога йўл қўйди.
Ямал бунгача бўлган мавсумларда каталонияликлар сафида ва Испания терма жамоасида уч мартадан пенальтини аниқ амалга оширган эди. Таъкидлаш жоизки, ҳужумчи бундан аввал Миллатлар лигаси доирасидаги Нидерландияга қарши кечган учрашувнинг ўйиндан кейинги пенальтилар сериясида адашган эди. Жорий клуб мавсумидаги 31 та ўйинда Ламин 15 та гол ва 13 та голли узатмани ўз ҳисобига ёзиб қўйди.
Ҳозирги вақтда «Барселона» 58 очко билан Испания олий дивизиони турнир жадвалида иккинчи ўринни эгаллаб турибди. Кейинги турда «кўк-анорранглилар» 22 февраль куни ўз майдонида «Леванте»ни қабул қилади.
