Профессионал бокснинг супероғир вазн тоифасида собиқ Жаҳон чемпиони, Халқаро бокс шон-шараф зали аъзоси, 59 ёшли америкалик Майк Тайсон ва беш вазн тоифасида собиқ Жаҳон чемпиони, 48 ёшли америкалик Флойд Мейвейзер ўртасидаги кўргазмали жанг 25-апрель куни Конго Демократик Республикасида ўтказилиши режалаштирилган. Бу ҳақда таниқли инсайдер Майк Копинжер Х ижтимоий тармоғидаги саҳифасида маълум қилди.
Аввалроқ Майк Тайсоннинг ўзи ҳам жанг ўтказилишини тасдиқлаган эди.
“Флойд билан жанг бўладими? Юз фоиз. Сиз мен рад этишимни кутганмидингиз? Бизнесларим билан банд эдим. Флойд менга чақириқ юборди”, деган эди Тайсон.
Маълумотларга кўра, жанг бўйича шартнома имзоланган ва уни SSI Sports компаниясига тегишли Fight Sports телеканали ташкил этади.
“Темир Майк” профессионал фаолияти давомида 50 та ғалаба, 7 та мағлубият қайд этган, унинг 2 та жанги эса бекор қилинган. Тайсон собиқ супероғир вазн тоифасидаги мутлақ Жаҳон чемпиони ҳисобланади.
Флойд Мейвейзер эса профессионал боксдаги фаолиятини мағлубиятсиз якунлаган бўлиб, 50 та ғалаба қайд этган, шулардан 27 таси рақибларини муддатидан аввал таслим этиш билан бўлган.
