Professional boksning superog‘ir vazn toifasida sobiq Jahon chempioni, Xalqaro boks shon-sharaf zali a’zosi, 59 yoshli amerikalik Mayk Tayson va besh vazn toifasida sobiq Jahon chempioni, 48 yoshli amerikalik Floyd Meyveyzer o‘rtasidagi ko‘rgazmali jang 25-aprel kuni Kongo Demokratik Respublikasida o‘tkazilishi rejalashtirilgan. Bu haqda taniqli insayder Mayk Kopinjer X ijtimoiy tarmog‘idagi sahifasida ma’lum qildi.

Avvalroq Mayk Taysonning o‘zi ham jang o‘tkazilishini tasdiqlagan edi.

“Floyd bilan jang bo‘ladimi? Yuz foiz. Siz men rad etishimni kutganmidingiz? Bizneslarim bilan band edim. Floyd menga chaqiriq yubordi”, degan edi Tayson.

Ma’lumotlarga ko‘ra, jang bo‘yicha shartnoma imzolangan va uni SSI Sports kompaniyasiga tegishli Fight Sports telekanali tashkil etadi.

“Temir Mayk” professional faoliyati davomida 50 ta g‘alaba, 7 ta mag‘lubiyat qayd etgan, uning 2 ta jangi esa bekor qilingan. Tayson sobiq superog‘ir vazn toifasidagi mutlaq Jahon chempioni hisoblanadi.

Floyd Meyveyzer esa professional boksdagi faoliyatini mag‘lubiyatsiz yakunlagan bo‘lib, 50 ta g‘alaba qayd etgan, shulardan 27 tasi raqiblarini muddatidan avval taslim etish bilan bo‘lgan.