«Ювентус» ҳимоячиси Пьер Калулу А Сериянинг 25-тури доирасидаги «Интер»га қарши баҳсда қизил карточка олгани учун битта учрашувни ўтказиб юборадиган бўлди.

Миланликларнинг 3:2 ҳисобидаги ғалабаси билан якунланган ўйиннинг 42-дақиқасида баҳсли вазият юзага келди. Фабио Миреттининг ноаниқ узатмасидан сўнг, Калулу Алессандро Бастонининг оёғига зарба беришига бир бахя қолди. «Неррадзурри» футболчиси контакт бўлгандек симуляция ишлатиб, майдонга йиқилди. Бош ҳакам Федерико Ла Пенна эса «Ювентус» ҳимоячисига иккинчи сариқ карточкани кўрсатиб, уни майдондан четлатди. Бастони ушбу қарорни гол урган каби кўтаринки руҳда нишонлади.

Спорт судьяси Жерардо Мастрандреа француз футболчисининг бир ўйинлик дисквалификациясини тасдиқлади. Шу тариқа, Калулу 21 февраль куни бўлиб ўтадиган «Комо»га қарши баҳсда жамоасига ёрдам бера олмайди.