"Манчестер Юнайтед" ва "Ньюкасл" Дортмунднинг "Боруссия" клуби ўнг қанот ҳимоячиси Юлиан Рюэрсон учун курашда "Барселона"га рақиблик қилади. Бу ҳақда "Bild" нашри хабар бермоқда.
Манба берган маълумотларга кўра, ҳар иккала инглиз клуби скаутларига 28 ёшли футболчининг фазилатлари маъқул келган. Улар Рюэрсонни "ҳар бир ўйинда бор кучини бериб ҳаракат қиладиган бақувват ва намунали жангчи" дея таърифлашган. Таъкидланишича, Англияда Рюэрсоннинг маошини уч бараварга ошириб беришлари мумкин.
Жорий мавсумда Рюэрсон барча турнирларда 29 та ўйинда иштирок этди ва ўз ҳисобига 13 та голли узатмани ёздириб қўйди. Футболчининг клуб билан амалдаги шартномаси 2028 йилнинг ёзига қадар мўлжалланган. "Transfermarkt" порталида келтирилган маълумотларга кўра, футболчининг бозор қиймати 20 миллион еврони ташкил этади.
