"Бенфика" ва Мадриднинг "Реал" жамоалари ўртасидаги Чемпионлар лигаси ўйинида Винисиус Жуниор иштирокида янги жанжал юзага келди. "Қаймоқранглилар" ҳужумчисининг сўзларига кўра, Лиссабон клуби футболчиси Жанлука Престианни уни ирқий камситувчи сўзлар билан ҳақорат қилган.
"El Larguero" хабарига кўра, УЕФА тахмин қилинаётган ирқчилик факти бўйича интизомий иш очади. Килиан Мбаппе ва яқин атрофда бўлган бошқа футболчилар кўрсатма беришлари мумкин, бироқ Престианнининг айбини исботлаш қийин бўлади, чунки у эҳтиёткорлик билан оғзини либоси (футболкаси) билан ёпиб олган. Агар "Бенфика" вингерининг сўзлари аниқланмай қолса, у жазодан қутулиб қолиши мумкин.
Ўйиндан кейинги интервьюда "Реал" футболчилари Жанлука Престианнини кескин танқид қилишди, Килиан Мбаппе эса ҳатто у "энди Чемпионлар лигасида ўйнамаслиги керак" деб баёнот берди.
