Мадриднинг "Реал" клуби Чемпионлар лигаси 1/16 финалининг илк учрашувида "Бенфика"ни минимал ҳисобда мағлуб этди. "Қаймоқранглилар" таркибида ягона голни Винисиус киритди.
Бразилиялик футболчи нафақат гол муаллифи, балки жанжал сабабчисига ҳам айланди. "Бланкос" вингери голни "Бенфика"нинг бурчак байроқчаси ёнида провокацион тарзда нишонлади. Бу эса португал клуби ўйинчиларига ҳам, мухлисларига ҳам маъқул келмади.
Кўп ўтмай майдонда тўполон бошланди ва унда Винисиус "бургутлар" аъзоси Жанлука Престианнини ирқчиликда айблади. Ҳакам ўйинни тўхтатди, аммо баҳс барибир давом эттирилди.
Жанжалга қарамай, бразилиялик футболчи ижтимоий тармоқларда ўша провокацион гол нишонлаши акс этган суратни жойлаштирди ва унга кескин хабар илова қилди: "Бернабеуда кўришамиз".
Жамоалар ўртасидаги жавоб учрашуви 26 февралга ўтар кечаси Мадридда бўлиб ўтади.
