«Барселона»нинг собиқ юлдузи Дани Алвес жамоанинг жорий мавсумдаги тактикаси, айниқса, мудофаадаги хатарли ўйини ҳақида гапирди. Бразилиялик собиқ ҳимоячи Ханси Фликка баъзи ўйинларда эҳтиёткорликни оширишни маслаҳат берди.
«Агар мен «Барселона» ва Ханси Фликка маслаҳат бера олсам, балки айрим ўйинларда ҳимояни бунчалик юқори чизиқда ўйнатишни тўхтатиш вақти келгандир, дердим. «Барса» ҳар доим жасур, ҳар доим ҳужумкор ўйнайди, лекин баъзида шу юқори ҳимоя чизиғи рақибларга ортда жуда кўп бўш жой қолдириб беради», — дейди Алвес.
Алвеснинг фикрича, бу тактика рақиблар учун қулай имконият яратмоқда: «Ўйинларни томоша қилар эканман, жамоалар бу бўшлиқдан қайта-қайта фойдаланаётганини кўряпман — битта узоқ пас, битта тезкор қарши ҳужум ва бирдан ҳимоя ўз дарвозаси томон югуришга мажбур бўлади. Ҳатто дарвозабон ҳам жамоани қутқариш учун жуда кўп қийин сейвлар қилишига тўғри келади».
