Миланнинг «Интер» клуби бош мураббийи Кристиан Киву Чемпионлар Лигаси доирасида «Будё-Глимт»га қарши ўйинда ҳужумчи Лаутаро Мартинес олган жароҳат ҳақида гапириб берди.
«Нерадзуррилар» сардори Чемпионлар Лигаси плей-офф босқичи ўтиш раунди доирасида Норвегияда бўлиб ўтган учрашувнинг 61-дақиқасида захирага олинди. Ушбу мажбурий алмаштиришдан сўнг меҳмонлар дарҳол иккита гол ўтказиб юборишди ва якунда 1:3 ҳисобида мағлуб бўлишди.
«Лаутаро сафдан чиқди. У анча жиддий жароҳат олди ва маълум вақт давомида жамоага ёрдам бера олмайди», — дея жавоб берди Киву аргентиналик форварднинг ҳолати ҳақидаги саволга.
Шанба куни «Интер» А Серия доирасида сафарда «Лечче» билан куч синашади, келаси сешанба куни эса ўз майдонида «Будё-Глимт»га қарши жавоб ўйинини ўтказади.
