Milanning «Inter» klubi bosh murabbiyi Kristian Kivu Chempionlar Ligasi doirasida «Budyo-Glimt»ga qarshi o‘yinda hujumchi Lautaro Martines olgan jarohat haqida gapirib berdi.
«Neradzurrilar» sardori Chempionlar Ligasi pley-off bosqichi o‘tish raundi doirasida Norvegiyada bo‘lib o‘tgan uchrashuvning 61-daqiqasida zaxiraga olindi. Ushbu majburiy almashtirishdan so‘ng mehmonlar darhol ikkita gol o‘tkazib yuborishdi va yakunda 1:3 hisobida mag‘lub bo‘lishdi.
«Lautaro safdan chiqdi. U ancha jiddiy jarohat oldi va ma’lum vaqt davomida jamoaga yordam bera olmaydi», — deya javob berdi Kivu argentinalik forvardning holati haqidagi savolga.
Shanba kuni «Inter» A Seriya doirasida safarda «Lechche» bilan kuch sinashadi, kelasi seshanba kuni esa o‘z maydonida «Budyo-Glimt»ga qarshi javob o‘yinini o‘tkazadi.













