Қибрайда кечган “Пахтакор-2” – “Машъал” баҳси якунига етгач, одатдагидек “газчилар” устозидан интервью олдик.
- Александр Андреевич, “Машъал” иккинчи босқични йирик ғалаба билан бошлади. Жамоа кўрсатган ўйиндан қониқдингизми?
- Тўғрисини айтсам, ўйиндан унчалик қониқмадим, аммо ғалабадан ҳаммамиз хурсандмиз. Негадир шогирдларим мен хоҳлаган футболни намойиш этишмади. Эҳтимол бу иккинчи босқич ўйинларининг энди бошлангани билан боғлиқдир.
- “Машъал”нинг қандай ўйин намойиш этиши рақибнинг кимлигига боғлиқми?
- Негадир футболчиларимиз “Пахтакор” билан ўйинларда ўзларини йўқотиб қўйишади. Олдин “Бунёдкор” билан ҳам шундай бўларди, лекин секин-аста бу қўрқувни енгиб боряпмиз. Аммо “Пахтакор”дан ҳадиксираш “Машъал” ўйинчиларида ҳамон давом этмоқда.
- Сизнингча, олдинда мухлисларни қандай чемпионат кутиб турибди?
- Ҳозирдан бир нарса дейиш қийин, аммо биринчи лига турдан турга қизийди деган умиддаман.
- Жиддий курашлар бўладими?
- Менимча, бўлади. Шуни ишонч билан айтишим мумкин, “Машъал”ни бир қатор қийин беллашувлар кутиб турибди ва йигитлардан бўшашмасликни сўраб қоламан.
- Иккинчи босқичда “Машъал”нинг асосий рақобатчиси сифатида кимни кўряпсиз?
- Фақат ўзимизни. Чунки ҳеч бир жамоанинг биздан устун жойи йўқ. Бошқалар учун бизни мағлубиятга учратиш осон бўлмайцди. Биз фақат ўзимизнинг хатомиз туфайлигина ютқазиб қўйишимиз мумкин. Биринчи лигада ҳеч қайси жамоа ўз кучи билан бизни юта олмайди.
- “Оқтепа” билан ўйинда Санжар Қувватов ва Жаҳонгир Абдумўминов майдонга тушадими?
- Биласиз, бу икки футболчимиз ҳозир миллий терма жамоа таркибида. Эшитишимча, 14 август куни терма жамоа ўртоқлик учрашуви ўтказади. Эртаси куни эса бизнинг ўйинимиз бор. Шундай экан, ҳозирча бу борада бир нарса дея олмайман.
