Биринчи лиганинг иккинчи босқичидан ўрин олган “Пахтакор-2” – “Машъал” баҳсидан сўнг “пахтакорчилар” бош мураббийи Илҳом Мўминжоновнинг фикрлари билан қизиқдик.
- Илҳом ака, йирик мағлубиятга нима сабаб бўлди?
- Биринчи сабаби сифатида таркибимизнинг тубдан ўзгариб кетганини айтишимиз мумкин. Биринчи босқичда тўп сурган футболчилардан 70 фоизини “Пахтакор”нинг ўринбосарлар таркибига бердик. Бундан ташқари, бугунги ўйинда олтита 1995 йилда туғилган ўйинчимиз иштирок эта олмади. Чунки улар айни пайтда терма жамоа сафида йиғин ўтказишмоқда. Шунга қарамай, бугунги учрашувда иштирок этган ўйинчилар кўрсатмаларимни бажаришга ҳаракат қилишди, лекин барибир тажриба ўз сўзини айтиб, “Машъал” ғалаба қозонди. Насиб қилса, навбатдаги ўйинимиз “Спартак”ка қарши кечади ва бу беллашув биз учун бирмунча осон ўтади деб ўйлайман.
- Ҳимоя чизиғи ва дарвозабонга эътирозингиз борми?
- Албатта, 0:4 ҳисобидаги мағлубиятдан кейин мураббийда барча футболчиларга нисбатан эътироз бўлади. Менда ҳам дарвозабонга ва ҳимояда тўп сурган ўйинчиларга эътироз бор. Кейинчалик шогирдларим қаерда хатога йўл қўйишганини бирма бир тушунтириб бераман.
- Йил бошидан бери деярли барча “Машъал”нинг олий лигага чиқишини гапириб келмоқда. Бу борада нима дея оласиз?
- “Машъал”нинг қанчалик кучга эга эканлиги кўриниб турибди. Менимча, бу жамоа ортиқча қийинчиликсиз олий лигага чиқади.
