Келаси ёзда «Тоттенхэм»да яна мураббий алмашиши кутилмоқда. Февраль ойида Томас Франк истеъфога чиқарилиб, ўз лавозимини тарк этган эди. Даниялик мутахассиснинг ўрнини мавсум якунига қадар вақтинчалик бошқарувчи сифатида тайинланган Игор Тудор эгаллади. Журналист Николо Скиранинг маълумотларига кўра, «шпорлар»нинг янги доимий мураббийи бўлишга икки асосий номзод бор — Маурисио Почеттино ва Роберто де Дзерби.

Аргентиналик мутахассис айни дамда АҚШ терма жамоасини бошқармоқда, бироқ у ЖЧ-2026 дан сўнг дарҳол «Тоттенхэм»га қайтишга тайёрлигини маълум қилган. Лондон клуби вакиллари 53 ёшли мутахассис билан музокаралар олиб бормоқда.

Де Дзерби эса шу ойда «Марсель»ни тарк этди. Манбанинг хабарига кўра, италиялик мураббий яна Премьер-лигада ўз кучини синаб кўрмоқчи. «Тоттенхэм» унинг номзодини бундан икки йил олдин ҳам кўриб чиққан эди.