«Бавария» бош мураббийи Венсан Компани Винисиус Жуниор ва Жанлука Престианни ўртасида юз берган можароли вазият ҳақида ўз фикрини билдирди.

«Реал» вингери Чемпионлар лигаси доирасидаги ўйинда (1:0) «Бенфика» ҳужумчисини уни «маймун» деб ҳақорат қилганликда айблаган эди. Аргентиналик футболчи гапираётганда оғзини либоси билан ёпиб олган, бу эса лаблардан ўқиш имкониятини йўққа чиқарган. Учрашувни Франсуа Летексье бошқариб борган эди.

«Бу мураккаб мавзу. Мен ўйинни кузатдим ва вазият мени қизиқтириб қолди. Бу воқеада учта турли қисм бор: биринчидан, майдонда нима содир бўлди; иккинчидан, мухлислар билан боғлиқ вазият; ва ниҳоят, ўйиндан кейинги ҳолат. Биз уларни алоҳида кўриб чиқишимиз керак.

Вазиятнинг ўзига ва Винининг реакциясига қарасангиз, бу сохта бўлиши мумкин эмаслигини тушунасиз. Бу ҳақиқий эмоционал реакция эканлиги кўриниб турибди. Унинг ҳакам олдига бориб, ўзига шунча азобни орттириб олишидан ҳеч қандай манфаат кўрмаяпман. Ўша сонияда у тўғри йўл тутганини англаб етганди.

Килиан Мбаппе одатда доим дипломатик тарзда гапиради, лекин бу сафар нимани кўрган ва эшитган бўлса, жуда аниқ ифодалаб берди. Шунингдек, нима деганини футболкаси ортига яширган «Бенфика» ўйинчиси ҳам бор. Стадионда одамлар «маймун» ишораларини кўрсатаётгани эса видеоларда ҳам акс этган», — деди Компани.