Хосеп Гвардиола матбуот анжуманида кутилганидек «Арсенал» билан чемпионлик пойгаси ҳақидаги саволларга жавоб берди. «Манчестер Сити» рақобатчисидан беш очко ортда қолмоқда, бироқ захирада битта ўйини бор.

«Аввал айтганимдек, 12 та ўйин — бу жуда кўп. Мен фақат «Ньюкасл»га қарши баҳс ҳақида ўйлаяпман. Лига Кубоги финали яқинлашганда «Арсенал» ҳақида ўйлаб кўрармиз. Ҳозир эса бор эътиборимиз — «Ньюкасл»да. Кейин дам оламиз ва ундан сўнг «Лидс» ҳақида бош қотирамиз.

Журналист сифатида сизни тушунаман, нима содир бўлишини олдиндан тахмин қилмоқчисиз. Аммо биз учун ҳозир фақат «Ньюкасл»га қарши ўйин аҳамиятга эга.

Декабрь ойи охирига қараганда чемпионлик имкониятларимиз ошдими? Ростини айтсам, билмайман. Қолган 12 та ўйинда нималар бўлишидан хабарим йўқ», — деди Гвардиола.

«Манчестер Сити» шанба куни ўз майдонида «Ньюкасл»ни қабул қилади.