Бекободнинг «Металлург» жамоаси янги мавсум олдидан таркибни мустаҳкамлаш ишларини изчил давом эттирмоқда. Клуб сербиялик ярим ҳимоячи Бранимир Йочич ҳамда тажрибали ҳимоячи Аслжон Бегимқулов билан шартнома имзолади.

31 ёшли Бранимир Йочич 1+1 кўринишидаги битим асосида «металлургчилар» сафига қўшилди. У фаолияти давомида «Мейчжоу», «Текстилас», «Мазия S&RC», «Младост ГАТ», «Рудар», «Спартак», «Сента» ва «Палич Коминг» каби жамоаларда тўп тепган. 2025 йил мавсумида Хитой Суперлигаси вакили «Мейчжоу» сафида 25 учрашувда майдонга тушиб, 1 гол ва 1 голли узатмага муаллифлик қилган.

Ҳимоя чизиғи эса Аслжон Бегимқулов билан тўлдирилди. Ўтган мавсумни «Хўжанд» сафида ўтказган тажрибали футболчи Ўзбекистонга қайтиб, янги мавсумда «Металлург» шарафини ҳимоя қилади. У фаолияти давомида «Сўғдиёна», «Машъал», «Бухоро», «Хоразм» ва «Янгиер» жамоаларида ўйнаган. Бегимқулов Суперлигада 123 та, Про-Лигада 35 та учрашувда майдонга тушган.