Лондоннинг «Арсенал» клуби вингери Нони Мадуэке ўзининг футбол оламидаги кумири ким эканлигини маълум қилди.

Англиялик футболчи Премьер-лига доирасида «Манчестер Юнайтед» сафида тўп сурган Криштиану Роналдуни алоҳида эътироф этди.

«Шубҳасиз, болалигимдаги асосий кумирим Роналду бўлган. «МЮ» давридаги Криштиану — бу шунчаки ақл бовар қилмас даража эди. У қўрқувсиз ва ҳеч қандай чекловларсиз ҳаракат қиларди — фақат олдинга интилиб, рўпарасидан чиққан барча рақибларни мағлуб этарди. Фаолиятининг кейинги босқичларида эса у голларни осонлик билан кирита бошлади. У мен кўрган илк ҳақиқий суперюлдуз эди ва мен унга ўхшашни истардим», — дея Мадуэкенинг сўзларидан иқтибос келтирмоқда The Touchline.

Ҳозирги вақтда Криштиану Роналду Саудия Арабистонининг «Ан-Наср» клуби шарафини ҳимоя қилмоқда. Шу ойнинг бошида португалиялик футболчи 41 ёшни қарши олди.