«Барселона» клуби президенти Жоан Лапорта ярим ҳимоячи Гавининг жароҳати ва тикланиш жараёни хусусида фикр билдирди. 21 ёшли футболчи ўтган йилнинг август ойида сафдан чиққан бўлиб, жорий мавсумда фақат иккита учрашувда иштирок этишга улгурган эди. Ярим ҳимоячининг тиззасидаги муаммолар жарроҳлик амалиётини талаб этди ва унинг майдонга қайтиши шу йилнинг март ойига режалаштирилган.

«Гави жароҳатдан сўнг қаттиқ изтироб чекди. У ҳатто кўзёш тўкди. У ўйнаш учун ҳар қандай нарсага тайёр эди ва агар талаб этилса, майдонга ҳатто қўлтиқтаёқда ҳам чиқишга рози эди.

Биз Гавининг тикланиш жараёнидаги ижобий натижалардан мамнунмиз. Жиддий жароҳатлар бутун жамоа муҳитига таъсир кўрсатади, бироқ тиббий ходимлар, мураббийлар ва Гавининг оиласи унинг максимал даражада самарали соғайишини таъминлаш учун бир ёқадан бош чиқариб ҳаракат қилишди», — дея Barca Universal нашри Лапортанинг сўзларини келтирмоқда.

Маълумот ўрнида, «Барселона» ўзининг навбатдаги учрашувини якшанба куни «Леванте» жамоасига қарши ўтказади.