Мюнхеннинг "Бавария" клуби бош мураббийи Венсан Компани Германия чемпионатининг 23-тури доирасида Франкфуртнинг "Айнтрахт" жамоаси устидан қозонилган ғалаба ҳақида фикр билдирди. Майдон эгалари 3:2 ҳисобида ғалаба қозонишди.
"Жамоа ҳаддан ташқари бўшашиб ўйнади, кўплаб вазиятлардан фойдалана олмадик. Учинчи голгача биз тўлиқ устунлик қилдик. Рақибга иккинчи голни ўзимиз совға қилдик. Меҳмонлар учрашув якунида босимни кучайтиришди. Аммо ғалаба бизда қолгани ва муҳим уч очкони қўлга киритганимиз ажойиб", — дея бельгиялик мутахассиснинг сўзларидан иқтибос келтиради клуб матбуот хизмати.
Бундеслиганинг 23 туридан сўнг "Бавария" турнир жадвалида пешқадамлик қилмоқда ва иккинчи ўринда бораётган "Боруссия"ни саккиз очкога ортда қолдирмоқда.
