«Тоттенхэм» ҳимоячиси Микки ван де Вен Лондоннинг «Арсенал» клубига қарши кечган учрашув ҳақида ўз фикрларини билдирди. АПЛнинг 27-туридан ўрин олган баҳс «канонирлар»нинг 4:1 ҳисобидаги ғалабаси билан якунланди.

«Менимча, «Арсенал» умумий олиб қараганда кучлироқ жамоа эди. Биринчи бўлимда ҳисоб 1:1 бўлиб турган пайтда биз ҳали ўйинда эдик. Кейин улар иккинчи голни уришди ва шундан сўнг жуда қийин бўлиб қолди. Рақиблар бизга қараганда анча кўп вазиятлар яратишди», — дея футболчининг сўзларидан иқтибос келтиради Sky Sports.

Янги мураббий Тудор ҳақида:

«У бутун ҳафта давомида биз билан бирга бўлди ва ўз футболини татбиқ этишга ҳаракат қилди. Биз бунинг устида ишладик. Бу унинг биринчи ҳафтаси эди, у бизга ҳар томонлама ёрдам беришни истаяпти. Энди олдинга интилишимиз ва «Фулхэм»га қарши ўйинга тайёргарлик кўришимиз керак».

«Тоттенхэм» АПЛ турнир жадвалида 29 очко билан ўн олтинчи ўринда бормоқда. «Арсенал» эса 61 очко билан биринчи ўринда.