"Милан" яримҳимоячиси Рубен Лофтус-Чик "Парма"га қарши ўйинда (0:1) олган жароҳати туфайли узоқ муддатга сафдан чиқди.
А Серия 26-тури доирасидаги ўйиннинг 8-дақиқасида Алексис Салемакерснинг жарима майдонига узатган тўпини "Парма" дарвозабони Эдоардо Корви мушти билан қайтараётиб, Лофтус-Чикка тегиб кетди. "Милан" яримҳимоячиси майдонга йиқилиб тушди, шундан сўнг майдонни замбилда тарк этди, унинг бўйни боғлаб қўйилди.
Журналист Жанлука Ди Марционинг хабар беришича, Лофтус-Чикни стадиондан шифохонага олиб кетишган. Хавбекда альвеоляр суяк синиши ташхиси қўйилган (тиш илдизлари жойлашган суяк), шу сабабли у яқин орада операция қилинади. Футболчининг тикланиши бир неча ой давом этиши кутилмоқда.
