«Барселона» президенти Жоан Лапорта клуб тарбияланувчиси Ламин Ямал билан боғлиқ амалга ошмаган трансфер тафсилотларини очиқлади. Унинг сўзларига кўра, икки йил олдин «ПСЖ» каталонияликларга вингер учун 250 миллион евро таклиф қилган, бироқ рад жавобини олган.

«Биз рад этдик. Ўшанда у 17 ёшда эди — баъзилар бизни ақлдан озган деб ҳисоблашган!» — дея журналист Фабрицио Романо Лапортанинг «Jijantes FC»га берган интервьюсидан иқтибос келтирмоқда.

Ямал «Барселона» асосий таркибида 2023 йилнинг апрель ойида, 15 ёшу 290 кунлигида дебют қилиб, «кўк-анорранглилар» тарихида Испания чемпионатида майдонга тушган энг ёш футболчига айланган эди. 2025/26 йилги мавсумда 18 ёшли футболчи барча мусобақаларда 33 та ўйин ўтказиб, 15 та гол урди ва 14 та голли узатмани амалга оширди.