Февраль ойи ўрталарида Мануэль Нойер жароҳат олган эди. "Бавария"нинг тажрибали дарвозабони тахминан уч ҳафтага сафдан чиққани ҳақида хабар берилганди. Бироқ Нойер кутилганидан эртароқ майдонга қайтиши мумкин.
"Bild" нашрининг хабар беришича, душанба куни Нойер дарвозабонлар мураббийи ва реабилитация бўйича мутахассис билан биргаликда майдонда машғулот ўтказди. Дарвозабон ҳозирча мураккаб машқларни бажармаяпти, лекин тўп билан ишламоқда, бу эса ижобий ўзгаришдан далолат беради.
Германияда Нойер барчани ҳайрон қолдириб, "Боруссия Дортмунд"га қарши ўйиндаёқ майдонга тушиши мумкинлиги ҳақида гап-сўзлар юрибди. Жамоалар шанба куни, 28 февраль санасида ўзаро баҳс олиб боришади.
"Бавария" Бундеслигада пешқадамлик қилмоқда, иккинчи ўриндаги "Боруссия" эса ундан саккиз очкога ортда қолмоқда.
