Килиан Мбаппе тиззасидаги муаммолар сабабли «Реал»нинг камида учта ўйинини ўтказиб юборади.

Бундан аввалроқ ҳужумчи кечаги машғулотни вақтидан олдин якунлагани ва «Бенфика»га қарши кечадиган жавоб учрашувида майдонга туша олмаслиги мумкинлиги ҳақида хабар берилган эди. «Реал» клуби Мбаппега камида 10 кунлик дам олиш зарур деб ҳисобламоқда.

L’Equipe нашрининг маълум қилишича, кечаги машғулотдан сўнг ўтказилган тиббий тест натижалари Мбаппенинг тиззаси тўлиқ соғайишдан ҳали йироқ эканини кўрсатди. «Реал»даги айрим мутасаддилар, бош мураббий Альваро Арбелоа унга умид қилаётганига қарамай, форвард бугунги ўйинда иштирок этмаслиги керак, деган фикрдалар.

Кутилишича, Мбаппе Ла Лиганинг навбатдаги иккита учрашувини — «Хетафе» ва «Сельта»га қарши баҳсларни ўтказиб юборади. Шунингдек, унинг Чемпионлар лигаси 1/8 финалининг эҳтимолий биринчи ўйинида қатнашиши ҳам сўроқ остида қолмоқда.