«Ювентус» дарвоза чизиғини кучайтириш учун вариантлар излашда давом этмоқда. La Gazzetta dello Sport нашрининг хабар беришича, Турин клуби Микеле Ди Грегорионинг ўйинларидан кўнгли тўлмаяпти ва уни янада юқори малакали дарвозабон билан алмаштирмоқчи.

Манбага кўра, асосий номзодлар сифатида «Ливерпуль» аъзоси Алиссон Бекер ва «Тоттенхэм Хотспур» посбони Гульельмо Викарио кўрилмоқда. Алисоннинг «қизиллар» билан шартномаси 2027 йилда якунланиши, қолаверса, бразилиялик футболчи аввал «Рома»да «бьянконери»нинг ҳозирги бош мураббийи Лучано Спаллетти қўл остида тўп сургани алоҳида қайд этилган.

Шунингдек, туринликлар Викарионинг трансфери бўйича унинг атрофидагилар билан алоқага чиқиб улгуришган. «Тоттенхэм» ўз дарвозабонини 25-30 миллион еврога баҳоламоқда.