«Барселона» қанот ҳимоячиси Жоау Канселу билан ҳамкорликни давом эттиришдан манфаатдор. Португалиялик футболчи жорий мавсум охиригача «Ал-Ҳилол»дан ижарага олинган. «Diario Sport» маълумотларига кўра, Каталония гранди раҳбарлари футболчи билан тўлақонли шартнома имзолашни исташмоқда. Бироқ бу фақатгина у Саудия клуби билан келишувини бекор қилиб, ёзги трансфер ойнасида эркин агент сифатида мавжуд бўлган тақдирдагина амалга ошади.
«Барселона» Жоау Канселуни январь ойида ижарага олган эди. 31 ёшли футболчининг «Ал-Ҳилол» билан амалдаги шартномаси 2027 йилнинг ўрталарига қадар мўлжалланган. Латералнинг қиймати «Transfermarkt» портали томонидан 10 миллион еврога баҳоланмоқда.
