2024-йилги Париж Олимпиадаси учун тайёргарлик базаси сифатида ташкил этилган “Олимпик” футбол клуби мураббийлари ва футболчилари 6 ойдан буён маош олмаётганликлари юзасидан Ўзбекистон футбол ассоциацияси ва Профессионал футбол лигасига масалани ҳал қилишга кўмаклашиш бўйича видеомурожаат йўллади.
“Олимпик” клубининг собиқ аъзолари маълум қилишича, мураббийлар штаби ва футболчиларга 2025-йилнинг май ойидан буён маош тўланмаган. Ярим йиллик қарздорлик масаласида Ўзбекистон футбол ассоциацияси (ЎФА) ва ЎзПФЛга расмий ёрдам сўраб мурожаат қилинган.
“Мен дарвозабонлар мураббийи сифатида 'Олимпик' жамоасида ишладим ва ўтган йилнинг май ойидан бошлаб 5 ярим ой маош олмадим. ЎФАга мурожаатим: илтимос, ойликларимизни ҳал қилиб беринглар. Бизнинг ҳам болаларимиз бор”, дейди клубнинг дарвозабонлар мураббийи Маъмур Икромов.
Шунингдек, бир қатор футболчилар ҳам ушбу маълумотни тасдиқлаган.
“Ўтган мавсумни 'Олимпик' сафида ўтказдим. Бизга 2025-йил май ойидан буён маошларимиз берилмади. Ўзбекистон футбол ассоциацияси, Равшан Эрматов, Диёр Имомхўжаев, шу масалани ҳал қилиб беришингизни сўраймиз”, дейди футболчи Дониёр Эркинов.
Ҳозирда мазкур ҳолат ЎФА томонидан ўрганилмоқда. Ассоциация мутахассислар ва футболчиларнинг ҳуқуқлари ҳимоя қилинишини таъминлашга ваъда бериб, яқин кунларда жараён натижалари бўйича қўшимча маълумот тақдим этилишини билдирди.
Мазкур лойиҳа Париж Олимпиадасидан сўнг ўзининг бирламчи миссиясини якунлагач, кутилмаган қийинчиликларга дуч келди. 2024-йилги Суперлига мавсумини 12-ўринда якунлаган жамоа, лигада қолиш учун кечган плей-офф баҳсида дастлаб “Шўртан”, кейинги баҳсда эса “Металлург”га имкониятни бой берди.
Бироқ “Металлург” клуби профессионал мақомини йўқотгач, Профессионал футбол лигаси (ЎзПФЛ) 2025-йилнинг 5-январига қадар “Олимпик” клубига Суперлигада қолиш имконияти ва лицензиялаш талаблари бўйича расмий муддат тақдим этди. Клуб 2025-йилги мавсумни Пролигада ўтказишга қарор қилди.
Жамоанинг етакчи футболчилари бошқа клубларга трансфер қилингач, таркиб ёшлар билан тўлдирилди. Аммо қуйи лигадаги иштирок муваффақиятсиз кечди — жамоа мавсумни сўнгги ўринда якунлади.
Ҳатто клуб 2025-йил ноябрь ойида Лигага расмий хат йўллаб, молиявий қийинчиликлар сабабли Пролиганинг сўнгги 20-туридан ўрин олган “ФарДУ” жамоасига қарши баҳс учун Фарғона шаҳрига бора олмаслигини маълум қилган эди.
Шундан келиб чиқиб, Суперлига ва Пролига регламентининг 9.11-бандига асосан, “Олимпик” жамоасига 0:3 ҳисобидаги техник мағлубият, “ФарДУ” жамоасига эса 3:0 ҳисобидаги техник ғалаба ёзилган эди.
2024-йилдаёқ Миллий Олимпия қўмитаси томонидан 2028-йилги Лос-Анжелес Олимпиадаси учун янги сикл доирасида “Олимпик Мобиуз” лойиҳаси ишга туширилган.
