"Бавария" дарвозабони Мануэль Нойер ҳали келажаги борасида бир қарорга келгани йўқ.

Kicker хабарига кўра, мюнхенликлар раҳбарияти дарвозабон билан шартномани яна бир мавсумга узайтирмоқчи. Бироқ, футболчи ўз қарорини фақатгина жисмоний ҳолатига асосланиб қабул қилади. 39 ёшли Нойер "Ванкувер"га ўтган Томас Мюллер каби хорижда фаолиятини давом эттириши истисно эканини ўзи учун ҳал қилди. Дарвозабон бу мавсум охирида ҳам, келажакда ҳам фаолиятини "Бавария"да якунламоқчи.

Мануэль Нойер 2011 йилда "Шальке"дан 30 миллион евро эвазига "Бавария"га ўтган эди. Унинг шартномаси 2026 йилнинг 30 июнига қадар имзоланган. Жорий мавсумда дарвозабон Мюнхен клуби сафида 28 та ўйинда майдонга тушиб, 27 та гол ўтказиб юборди ва тўққизта ўйинда ўз дарвозаси дахлсизлигини сақлаб қолди.