«Сантос»нинг бразилиялик ҳужумчиси Неймар Бразилия чемпионати 4-туридан ўрин олган «Васко да Гама»га (2:1) қарши ўйинда ватандоши Тьяго Мендес билан содир бўлган можаро ҳақида гапириб берди.
«У доим жанжал чиқаришга ҳаракат қилади. Бир сафар у мени «Пари Сен-Жермен»да ўйнаб юрган вақтимда жароҳатлаган эди, бугун эса буни яна такрорлашни ваъда қилди. Кўрамиз, мени яна бир бор майиб қилишга унинг жасорати етармикан», — дея Неймарнинг сўзларини келтирмоқда «Liberta Depte» ўзининг Х ижтимоий тармоғидаги саҳифасида.
Қайд этиш жоизки, «Васко да Гама» билан ўйинда Неймар дубль қайд этиб, жамоасининг ғалабасини таъминлади.
Неймар 2025 йилдан бери «Сантос» шарафини ҳимоя қилиб келмоқда. Футболчининг клуб билан шартномаси 2026 йилнинг декабрига қадар мўлжалланган.
