«Ливерпуль» дарвозабони Георгий Мамардашвили жамоадаги захира посбони ролидан тобора кўпроқ ҳафсаласи пир бўлмоқда. «Қизиллар»нинг асосий дарвозабони Алиссоннинг шартномаси 2027 йилнинг ёзига қадар мўлжалланган. Бу ҳақда «TEAMtalk» хабар бермоқда.

Манба берган маълумотларга кўра, грузиялик футболчи келаётган ёзда ижарага кетиш вариантини кўриб чиқмоқда. Мерсисайдликлар Мамардашвилининг кайфиятидан хабардор қилинган. «Ливерпуль» раҳбарияти 25 ёшли дарвозабонни жамоанинг келажаги сифатида кўрмоқда.

Жорий мавсумда Мамардашвили барча турнирларда 11 та ўйинда иштирок этди ва уларнинг 3 тасида ўз дарвозаси дахлсизлигини сақлаб қолди. Футболчининг клуб билан амалдаги шартномаси 2031 йилнинг ёзига қадар тузилган. «Transfermarkt» портали тақдим этган маълумотларга кўра, футболчининг бозор қиймати 28 миллион еврони ташкил этади.