"Галатасарой" ва "Фенербаҳче" клублари шарафини ҳимоя қилувчи икки футболчи букмекерлик ўйинларида иштирок этгани учун қамоқ жазосига ҳукм қилиниши мумкин.
Гап "Галатасарой" аъзоси Метеҳан Балтажи ва "Фенербаҳче" сардори Мерт Ҳакан Яндаш ҳақида бормоқда. Балтажи 13 йилгача, Яндаш эса 17 йилгача озодликдан маҳрум этилиши мумкин.
"Sabah" нашри тарқатган маълумотга кўра, Балтажи камида икки марта "Галатасарой" иштирокидаги ўйинларга тикиш қилган. Ўша вақтда у жамоанинг асосий таркибида бўлмаса-да, қайдномадан жой олган эди. Шу тариқа, футболчи ўйин натижасига таъсир ўтказиш имкониятига эга бўлган.
Туркиянинг амалдаги қонунчилигига кўра, футболчи букмекерлик компанияларига ўзининг профессионал спортчи мақоми ҳақида хабар бериши шарт эди, бироқ у бундай қилмаган.
