"Galatasaroy" va "Fenerbahche" klublari sharafini himoya qiluvchi ikki futbolchi bukmekerlik o‘yinlarida ishtirok etgani uchun qamoq jazosiga hukm qilinishi mumkin.
Gap "Galatasaroy" a’zosi Metehan Baltaji va "Fenerbahche" sardori Mert Hakan Yandash haqida bormoqda. Baltaji 13 yilgacha, Yandash esa 17 yilgacha ozodlikdan mahrum etilishi mumkin.
"Sabah" nashri tarqatgan ma’lumotga ko‘ra, Baltaji kamida ikki marta "Galatasaroy" ishtirokidagi o‘yinlarga tikish qilgan. O‘sha vaqtda u jamoaning asosiy tarkibida bo‘lmasa-da, qaydnomadan joy olgan edi. Shu tariqa, futbolchi o‘yin natijasiga ta’sir o‘tkazish imkoniyatiga ega bo‘lgan.
Turkiyaning amaldagi qonunchiligiga ko‘ra, futbolchi bukmekerlik kompaniyalariga o‘zining professional sportchi maqomi haqida xabar berishi shart edi, biroq u bunday qilmagan.
