Хабарингиз бор, 2011 йилдан бошлаб “Насаф” жамоасининг Қаршида ўтаётган барча учрашувлари Германиядан келтирилган КТС (кўчма телевизион станцияси) томонидан ўта юқори сифатда тасвирга олинмоқда.

Шу вақт оралиғида КТС ходимлари томонидан нафақат жамоамиз иштирокидаги беллашувлар, балки вилоятимиз ва мамлакатимиз миқёсида ўтказилаётган йирик тадбирлар ҳам видеотасвирга олиниб, ТВ каналлари орқали юртдошларимизга тақдим этилмоқда.  Биргина шу йилнинг ўзида Ўзбекистон миллий терма жамоасининг ЖЧ саралаши доирасида Тошкентда ўтган барча учрашувлари, шунингдек “Асрлар садоси” фестивали, “Билайн” компанияси томонидан ташкил этилган “Зўр-зўр стар” лойиҳаси ҳам айнан “Насаф” КТС томонидан тасвирга олинди.

Иккинчи давранинг илк учрашуви — “Насаф”- “Гулистон” баҳси ҳам КТС томонидан тасвирга олинган бўлсада, шу куни КТСнинг юқоридан тасвирга олувчи махсус “ўргимчак- камера”си (паук) ишлатилмади. Бу эса мухлисларнинг хавотирига сабаб бўлди. Маълум бўлишича, куни кеча ушбу ускуналарни “Марказий” стадионга ўрнатган москвалик мутахассислар Қаршига ташриф буюришган ва профилактика ишлари олиб борилган. Натижада мухлислар Ўзбекистон кубоги ярим финал жавоб ўйинидан ўрин олган “Насаф”- “Пахтакор” учрашувини бевосита стадиондаги улкан мониторлар орқали ҳам кузатиб бориш имкониятига эга бўлишади.

Шў ўринда яна бир янгилик: жамоамизнинг “Пахтакор”га қарши учрашувниниг эртасигаёқ (23 август) куни “Насаф” КТС Самарқандга жўнаб кетади ва “Шарқ тароналари” халқаро мусиқа фестивали тантаналарини тасвирга олади.